萬千寵愛在我身

我係屋企o既么女，細細個已經萬千寵愛在一身，我好野蠻，想要o既嘢最後必定要到手方肯罷休，麻麻(Grandma)仲會因應我o既野蠻行為稱呼我，有霸王眼、大王眼(唔好問我點解要跟個眼字，我估....係鄉下興o掛?!!!)

如果我生o係而家呢個年代，o個啲撒賴行為極有可能被拍低放上youtube揚威海外~~

婚事籌備o既初期，因為一啲小事同麻麻鬧得甚不愉快，好彩最後都應該係佢因為好錫我而蓋過咗一切，自此之後，有啲咩無傷大雅又可以比佢話事o既例如買咩色o既床單龍鳳被、敬茶茶杯o既款式呀、o係邊度出門等等，我哋都會"詐詐帝"問o下佢等佢話o下事，仲記得我哋買咗套床單喇鋪好咗影咗相比佢睇，佢睇到o個啲囍字成張床單都係，又紅又黃喜喜慶慶咁，佢真係笑得好開心o架~~

又有一次，我心急又貪平啲買咗只係得4隻茶杯o既敬茶茶具，佢話應該要有6隻o架，六六無窮吖o麻(我仲心諗：唔好o喇掛？結婚都要六六無窮？)

雖然我同查理斯都唔信呢啲嘢，但係都番去問可唔可以換番6隻o個套？好彩佢比我哋單買多2隻杯，雖然最後成套o既價錢要成$120，但話番比麻麻知我哋買番2隻杯喇，佢o個個又滿意又歡喜o既笑容真係咩都抵番晒啦~~

呢兩日到佢"詐詐帝"打o黎問我幾時番去食團年飯，又問我隻手幾吋要買幾大隻龍鳳鈪 (大家有所不知，我隻手真係特別肥o都o都o架，而家每隻手會戴2隻鈪，如果仲要戴多一隻上去，呢一隻極有可能戴唔到或者會夾住我隻肥手o架.......)

佢話係爹哋話問咗就去買，我話唔好啦，唔駛買啦，媽咪買咗奶奶又買咗，戴咗上去都唔知邊個買o架啦 (然後我又忽發奇想，乜福物福可以出一款金鈪大大隻字寫住爸爸贈、奶奶贈等字款o黎代替啲囍字，可能都會有市場~~)

麻麻又話佢都要買條鍊比我，以前佢買落比我哋o個啲刻住"幸福"、"健康"o既金牌吊墜都趁金價高時賣晒lu~~所以佢無咩錢只係可以買到條約莫1萬蚊o既金鍊比我o乍......

一聽到呢度，我真係 好 感 動 呀!!!!!!

麻麻有咩錢吖？1萬蚊應該係佢成年o既洗費喇，打呢條金鍊分分鐘用晒佢成幅家當咯，所以我講咗好耐叫佢唔好買啦，如果要買就買隻花花戒指啦，平好多又靚又大體，但係第一次嫁孫o既佢又點會肯聽我講吖？佢仲話家姐話戒指留番比佢買，唉，都未勸得掂一個又多一個話要買........

唔單止麻麻開始為我張羅，媽咪做開o既公司成日都有啲電器贈品例如小家電或者砂煲砙鐣，以前佢都會好瀟洒咁話唔要，而家佢成日都吼住有無啲煲呀、鑊呀o個啲攞番o黎比我，又攞咗好多個家電o個啲盒比我裝起晒啲襟花/pompoms(我可以想像到時啲兄弟姊妹抬住啲一箱二箱電飯煲、焗爐、炆燒鍋o既紙盒進入半島時有幾壯觀，哈哈，半島啲人可能以為我哋自己煮o黎擺酒呀!!!!!wakakakkaka~~)，我成日都整啲佈置品搞到屋企一盒二盒三袋四袋，原本走簡約家居風o既媽咪突然轉呔比我走雜物多多風，無怨言之餘仲成日話可以幫我整tim~~

以上種種都令我  好 好 好 感 動 呀!!!!!

我屋企唔係啲咩富有之家，我諗小康都係夾硬先稱得上，為咗我呢次o既金絲盛宴佢哋都想將佢哋能力範圍做到最好o既比我，帶住呢份無形但係好有質量o既累積咗三十年o既寵愛去嫁，我還會不幸福嗎？