夫復何求

我唔信有前世，但都好想講句，究竟我前世做咗啲咩好事，可以有個查理斯咁好o既男朋友以至未來老公呢？

佢孝順善良專一簡單有愛心無機心有耐性唔急躁唔食煙唔飲酒唔賭唔講粗口守時守信用大而化之，最好o既係佢真係當我係一個寶咁愛我錫我縱我我話好佢唔忍心話唔好！

每次我病o既時候佢都會盡可能陪o係我身邊照顧我──

記得幾年前有次近聖誕節，我個頭同塊面生咗好多一撻撻o既癬，又痕又痛又流血(真係好恐佈o架!!成個頭皮同塊面o係無抓損o既情況下不斷滲血結焦!!)

o個時睇咗醫生都唔知咩事，o係屋企打算出發去醫院睇o下係咪咩病毒o既一刻見到佢o黎咗，佢請咗假同我去呢，o個刻真係感動到喊咗出o黎呀!!

後尾醫生話係濕疹(!!!所以唔好睇少濕疹，真係一發不可收拾，嚇死人呀!!!!)，佢日日放假都上來幫我用盆慢慢洗頭同吹頭，又因為我無得出街睇燈飾，呢個傻佬買咗啲聖誕燈串同埋裝飾佈置咗我張床，我瞓o係床度就睇到啲燈飾好靚呢~~

呢幾日我又病又去醫院，佢都陪住o係我身邊，我同佢講我好囉囉孿唔知做咩驚咩，佢總係攬住我同我講：傻囡，唔駛驚喎，萬大事有我喎!!!

我真係好感動o架!!! 小女子何德何能配得一個近乎完美o既另一半呢？(無錯，係近乎完美，如果有埋劉華咁o既外表喇喎，咪係完美囉~~)

望住每年o個啲大大小小o既DIY，陪我走過咗好多日子！有時自己會重覆又重覆咁睇住o個啲嘢，每次都好依然好震撼，難得o既係佢o既工作從來都唔係輕省得閒朝九晚六準時放工，試過連續半年晚晚9點都未放工又一個月晚晚通宵又要出trip放工番到屋企都仲要覆email，但佢在每一次o既節日都為我送上驚喜，好喜歡佢唔係隨街買啲嘢比我，每樣嘢都經過佢對大大對o既手加工，如果有一日可以有個博物館將呢啲嘢放晒入去就好喇，等所有曾經受過愛情傷害或者對愛情失望o既人都知道呢個世界仲係有咁簡單o既真愛o架~~

沉浸o係幸福之中又難免諗埋啲傻嘢，好驚幾廿年霎眼就過，總有一個要先行一步，無咗佢o既話，我咩都唔係lu，所以呢，查理斯，你要好好保重身體，長命過我一兩歲，等我可以安安樂樂咁匿埋o係你懷抱入面幸福到老呀~~