陀一個BBo既時間

距離大日子仲有10個月，剛剛好係陀一個BB o既時間，到時我哋第一個愛情結晶品就會誕生喇~~

大家咪諗錯隔離呀，唔係笨啦啦呀~~個愛情結晶品係我哋o既"金絲盛宴"呀~~哈哈~~

由初初籌備倒數有24個月，突然去到10個月，都唔知中間o個啲月份去咗邊，好似好快突然就由24減到10咁，望住啲日子一日一日咁過去，開始好有殺到埋身o既感覺，但係感覺亦開始由positive變成negative......

其實拍咗咁多年拖，每一次去完街番屋企我都仲會有依依不捨o既感覺o架，尤其係我哋一直都唔係住得近，初時係九龍西→港島東，而家係新界北→港島東，每次行完街佢都好難送我番屋企，一個人坐車番屋企o個種迢長路遠獨自歸去o既感覺又唔係咁好受，所以我成日都會話：如果我哋而家結咗婚一齊住一齊番屋企就好喇!!! (我估計我講呢句說話o既次數仲多過我講對唔住~~)

但係呢排每次我講呢句說話，查理斯都會話：好快喇好快喇，仲有10個月o乍~~

聽到呢句說話都無咁興奮期待喇，取之而代o既係因為有好多unknown而引起o既不安同焦慮......

第一個問題係：我能成為一個合格o既老婆嗎？

雖然查理斯一定係答：梗係得啦~~(佢敢答唔得咩?!!!!)

但係o係我心目中"成為人哋老婆"不單是稱呼上o既轉變、尋求長久的關係咁簡單，反而有好多實際生活上o既需要我希望我能夠做妥做好啊.....

例如我期望我可以供給我丈夫一日三餐溫飽(純粹係煮食過程，唔包支出o架~~)，小女子好喜歡煮嘢食，要煮啲小炒家常便飯都無問題，但係.....呢個查理斯最唔識欣賞o既就係我o既廚藝啊!!! (誰說要留住一個男人o既心就要識煲湯呢？我看用在查理斯身上可以改成──要留住呢個男人o既心就要適炸薯條整o者喱.....佢鍾意食o既嘢就正正係大家去啲餐廳兒童餐o個啲呀!!!!)

佢只係要求每餐炸呢炸路、煎腸煎蛋煎午餐肉、炒飯炒粉炒公仔麵，飲老火湯就好似飲苦茶咁，魚同海鮮都咪搞佢~~

當然唔駛煮就唔駛洗，都係好o既，但係第日有仔有女o既時候我唔想我啲仔女都係得呢啲嘢食喎，所以成為我老公可能係會變得──無啖好食!!!

至於洗衫清潔家居我都唔怕o既，因為我而家都係自己開洗衣機自己晾衫，清潔呢啲嘢只要我"的"起心肝同有齊"架生"都難我唔到，咁究竟我擔心啲咩呢？

就係我o既身體狀況喇.....

踏入2011年，身體仲差過舊年，又感冒菌入腸胃又腸胃炎，呢個禮拜去咗兩次急症室喇，可憐我咁大個女都係第一次吊鹽水抽血，平時幾痛都唔會嗌痛o既我原來好怕支針插住o係手o既感覺，好恐怖好似睇SAW咁恐怖呀!!!!

呢幾日都好囉囉孿，都唔知做咩，啲腸胃又痛又嘔好辛苦.....

無健康照顧唔到自己又點照顧一個屋企呢？唉......唯一好彩o既係濕疹似乎進一步離我而去喇~~

10個月後就會成為人哋老婆，好命o既話再加多10個月就會成為人哋媽媽，希望o係呢個只夠陀一個BB o既時間我可以養好身子、學習點樣做一個稱職o既老婆啦~~