趁住國慶有3日假期 + 未來99生日，報咗個短線團，係康泰o既2日1夜盤龍峽之旅，每位盛惠$1399 另加$100小費，未去就好期待，去完就現眼袋~~
(睇得公主嫁到多，鍾意玩押韻呀~~)
呢個團的集合時間係6:15am o係中港城(點解去旅行要咁早呢.....後來我總算明白了)，我哋會搭7am的船去順德，大約搭咗2.5小時去到順德，本應要再搭2小時旅遊巴到午膳的餐廳，但係.....我哋足足搭咗4個鐘呀!!!!!! 
超級大塞車呀!!!!!! 
瞓 + 醒無數次望o下前面都係一望無際o既私家車，原來好多同胞趁呢個假期自駕遊 (我再一次對中國經濟已經起飛毫無質疑，因為沿途都是Benz，好像名車展咁) 但唔知係咪佢哋啲司機呢日都放假，所以主人要自駕，搞到撞完一次又一次，情形大約係以為已經解決的3車連環撞，前面大約仲會遇到5次!!!!!!!!!! 
結果搭到第3個半鐘，有個中途服務站，可以比大家落車去o下厠所咁，因為已經幾個鐘頭 + 今次一別厠所唔知幾時先有，梗係要閉氣排隊啦~~個女厠有好多格o架，但係啲人多到.....我會將之形容為多過星期日中環皇后像廣場的賓賓~~
好彩我拉住未來99左攝攝右攝攝，攝到條短隊，出面o個啲排緊幾廿人一條，我哋等2,3個o乍.....(其實都唔明點解啲人唔行入去.....)
然後上番車再坐咗45mins, 終於都到o個間咩農家餐廳食午飯喇~~
可能上天真係想我哋體驗o下中國地大脈搏，食完飯仲要坐多2個鐘頭車先到肇慶的盤龍峽呀!!!!! (唔塞車計，但我真係好好好唔明白，點解一早搭船要搭去順德呢？明明見到隔離條隊係去肇慶o架喎，既然係要去肇慶，為何要坐旅遊巴搞到個人好慶咁去肇慶呢？)
好彩，呢次就真係暢通喇，去到第一個景點金林水鄉(陰公，o個時已經4pm)，聽個名你會諗到啲咩呢？威尼斯水鄉？朱家角水鄉？總之就係應該有條橋有啲水o係下面o個啲啦.....但係，中國人改名真係有一手，水鄉係無呢啲嘢o架，大家應該幻想o下你而家去到一條好舊的元朗村落，兩邊都有一啲破舊的磚屋，行到盡頭有嘢睇喇，就係睇o下點釀酒喎(actually，佢啲酒已經係一酲酲擺晒o係度)，試食少少酒槽花生(呢個yummy~~因為...完全無酒味，係甜甜哋o架o乍~~)然後食咗碗好滑但無豆味的豆腐花，再向前行一陣就遊完呢個景點o架喇~~
呀，中間有個自費項目，但我哋都無興趣，因為係.....豬！跳!! 水!!!
好喇，再搭咗20mins車，終於去到盤龍峽渡假村喇!!!! 但係.....村內啲同胞仲多過天安門門口喎.....
等導遊搞好啲房，終於可以去我哋心儀已久的觀星閣喇，yeah~~(見官方照片)
好喇，大家都見到個天窗喇呵？係咪好期待呢？當我同查理斯沖完涼乾乾淨淨咁瞓o係度諗住睇星之際，一粒星都見唔到喎(但明明o係屋出面見到好多o架...)我哋見到o既只有兩塊閣面，o個個天窗只係倒照咗我哋個樣，好似照鏡咁......唉.....又比人呃咗.....
算！起身睇公主嫁到好過呀~~
睇完都無咩好做喇，瞓啦~~(其實呢度係有露天溫泉o架，但只要你諗o下有好多同胞會同你一齊o係o個度浸o下浸o下，你仲會唔會想落水呢？我諗連浸腳都唔好諗喇~~)
第二朝食完個自助早餐之後就坐村內o既小巴上山，大約10 mins，就到咗山頂喇，見到好多好多水車，導遊話呢個就係第二個景點水車群喇，有62個咁多o架~~(嘩嘩嘩.....真係好多喎~~但.....我想問第1個同第62個除咗size唔同之外，有咩分別呢？) 導遊話大家只要沿住山路向下行，最終就會見到薰衣草田園o架喇~~
我哋一行4人馬不停蹄咁行呀行，沿途除咗無數的石級之外，仲有瀑布o既.....但係好似同世界之窗o個個無咩分別......
我只係知道報團的時候我哋特別問過o個個分行職員，呢個團唔會唔好辛苦？適唔適合老人家？佢話「無問題!!!!」
究竟佢係以為我哋家中o既老人家係洪七公定葉問呢？點解要行千幾級樓梯都係唔辛苦呢？未來99行到一半已經話不停咁落樓梯令到佢腳震震同埋膝頭好軟呀.....但無法子.....我哋自身都難保，唯有繼續向前行......
好咯，終於到咯!!!! 終於都見到o個啲薰衣草....苗!!!!!!! 我估將花墟有的薰衣草加埋插番落啲田度都會多過o個度囉.....我哋連影相的興緻都失去了......
最離譜o既係我哋發現......個薰衣草田咪就o係朝早食早餐的餐廳後面囉!!!!!
點解要我哋坐車上山再行番落o黎呀？
點解唔比我哋揀上唔上山呢？
康泰的服務真係無得彈!!!!! 咁完美的行程只應天上有!!!!!(因為人係要用腳行,天上o個啲應該可以用飄~~)
然後所有景點行程已經完結，又可以搭2個鐘頭車去食飯喇，食完飯？咪再搭2個鐘頭車去番順德搭船番香港囉，我哋睇完薰衣草苗先10:30am，但我哋番到香港係7:45pm呀!!!! 大家自己衡量o下值唔值得去呢個"坐番夠本旅遊巴之旅啦"~~
講咗咁耐，頭先o個啲都唔係重點~~(哈哈哈哈哈~~如果你睇到o黎呢度都仲會睇落去，我真係想錫你一啖喎~~)
今篇blog寫o黎係要記念一個中年領隊同一個約6歲的死仔包，我本身真係好鍾意小朋友o架，但假如呢個係我個仔，我會考慮將佢遺落o係肇慶.....
話說一上旅遊巴，呢個死仔包同佢老豆坐o係我後面一行，當大塞車剛開始時，人人都好夢正酣，佢居然唱起歌o黎喎：
「A B C D E F G，去到厠所無厠紙，無厠紙呀用手指，撩o下撩o下好Happy~~
A B C D E F G，撩o下撩o下好Happy~~」
我唔係記憶力驚人，只係佢唱咗5次有多，我真係好難唔記得o架喎.....
養而不教o既老豆好溫柔咁勸阻佢，「好喇」、「唔好唱喇」
咁呢個死仔包確係好孝順o架，咪唔唱囉，不過開始玩"接龍"......
佢唔唱，佢講：去到厠所無厠紙，用手指，手指斷咗用鼻屎，鼻屎無咗用木棍，木棍斷咗用蟹籽.....佢大大話話用咗幾廿種嘢去代替厠紙，我真係無辦法可以好似佢咁如數家珍咁數番出o黎......
佢老豆今次又點做呢？
老豆：「邊個教埋你啲咁核突o既嘢o架？唔好再講喇，停喇！」
死仔包：「無人教o架，我自己識o架~~」
然後，個死仔包又話：「點解唔派啲戰機o黎炸晒啲車呀.....咁咪唔塞囉......」
今次換咗敗兒母答：「o下，咁會炸死晒啲人o架喎，乜你咁殘忍o架.....」
死仔包：「我鍾意殘忍喎！」
我心諗：你有無腦o架？戰機淨係炸塞住o個啲車？炸鬼埋你呀死蠢~~你細細個都咁殘忍，遺留你o係中國真係對唔住啲同胞呀，應該送你去北韓呀!!!!!!
最搞笑係呢個咁溫柔o既老豆，去到行程o既最後一餐午膳，有間廂房比我哋團人入去食飯，入面個電視好大聲，佢問人攞搖控較細聲啲，但個侍應話無o架，較唔到o架，可能人哋唔係唱出o黎佢唔慣啦，佢竟然大大聲聲好晦氣咁話：好啦咁熄咗佢啦~~又投訴人哋態度差又話叫人唔好做番歸，我真係想講，你咁義正辭嚴呀，教o下你個死仔包啦唔該~~咁細個都口不擇言又死不知錯，第日弑父殺母咪呢啲囉!!!!!
講完呢個死仔包，仲有個領隊.....佢o既外形好似夏雨，真實年齡不詳。
行程去到最後一程，領隊居然話要唱番2首歌比大家聽喎......分別係....真心真意同餓狼傳說!!!!!!
最好笑o既係，佢話佢要唱張學友啲歌，個死仔包話自己都好鍾意張學友o架(你咪以為佢老吹呀~~)，個領隊話要唱快歌，個死仔包即刻講得出餓狼傳說呀!!!!!!後來仲話要聽望月呀!!!!! 再後來佢哋講起明日世界終結時tim呀~~查理斯的comment係：張學友真係好紅呀!!!!!!
至於佢唱成點.....我只可以話，一首起兩首止好了。
如果要為這次旅行寫個終結，小學生作文會寫「帶住依依不捨的心情回家去了」，但我會寫「抱住歸心似箭的心情決定以後唔再跟康泰同埋唔會推介人哋去盤龍峽」！
補充：o個度出名的泥煨雞又真係好好味o既~~RMB70會送埋去房度o架喇~~
)
)
