兩週年(附白菊)

經過咗第一年的教訓，今年佢唔敢有咁多驚喜喇~~

仲記得呢一年我哋去咗長洲慶祝，去之前你要去瑪麗覆診，由於我係一個勁心急o既人，所以o係搭小巴落番中環的途中我係咁搶你個袋要摷o下有咩禮物~~

摷呀摷，摷咗佢出o黎~~「蛋撻王子」

呢個名係我幫佢改o架，你哋睇o下佢隻色幾似好好味的蛋撻呢~~

佢仲識行識走識唱歌啦~~佢肥肥的腳行來行去時真係好得意o架~~

由於一早已經搵到份禮物，所以去到長洲都係吃喝玩樂~~到咗夜晚，我沖完涼，發覺....

蛋撻王子多咗頸巾呀!!!!!!

佢好變態織咗條頸巾呀!!!!!!

不過今次唔係佢睇睇o下就識o架~~係佢去咗啲冷舖學o架~~

好靚呀!!!!! 隻色係漸變o架~~(漸變係佢揀咗舊咁o既冷，織出來真係好靚好特別o架~~因為我皮膚好敏感，佢話呢隻冷特別柔軟好舒服o架~~)

一個男人走去同啲師奶一齊織織復織織，又真係唔易o既~~加上佢隻超大的手同手指，我係完全諗唔到佢係點樣拎住支織針同條冷o架~~

大家唔駛懷疑佢係買o架，因為佢後來真係o係我面前織咗少少，我只可以對住佢唱：怎麼天生不是女人？

因為時間趕迫所以佢日又織夜又織，番工lunch攞入厠所織，放工去咗公園織(費事比屋企人見到啦)，後來仲趁我唔o係屋企攞比家姐收針呀!!!

佢瞞住我做咗咁多嘢而我完全唔知，真係超感動o架~~

家姐的評語係：有天份呀，唔似得阿妹一時大力一時細力又漏洞，好好呀~~

說真的，一齊咁多年我都無織過一件半件比佢，係因為

1. 佢話自己係雪人，完全唔著冷衫的

2. 佢自己都識啦，仲織得好過我多多聲~~

好啦，讚啦，寫得出o黎都預咗大家係要讚佢o架喇~~(你哋o既留言將會成為8週年我送給佢最好的禮物啦~~yeah yeah~~慳番一筆~~)

*********************************************************************************

原來呢個又係2週年o架喎~~

差啲漏咗，其實o個年的舊曆生日仲收到花tim.....大家真係估都估唔到，佢送咗紮好大的花....

連花樽比我呀!!!!! (你看到紮花企得好穩陣嗎？因為係有個超厚玻璃花樽o係底啊~~)

直程就係人哋放reception 那種枱花呀!!!!仲有塊金布圍住做packing o架~~

結果，放工時我由收花女變咗送花女咁，將o個樽花入番落個紙箱度用尼龍繩穿住個紙盒拎番屋企呀，真係重到呢.....

大家仲要唔好忘記個花樽入面係有水o架!!!!!

我完全感受唔到人哋拎住紮花o係街度行o個種自豪呀!!!!!只係覺得人人望住我都諗，哎呀，呢個女仔去送花喎~~

順帶一提，佢第一次送花比我係2003年的沙士期間，我哋去咗長洲玩，佢一早起身去買早餐，路經花檔，見到好多花，又記得我講過鍾意太陽菊，結果──

佢同阿姐講：我想要呢束呀，紮靚啲，我送比人o架。(而阿姐好古怪咁望住佢....)

你唔會諗得到呢個笨旦居然──

買咗一紮人哋拜山o個啲白菊比我呀!!!!!!!

(看到了嗎？活脫脫就是送給仙遊人的花花呀~~我還早收了幾廿年.....)

因為o個時正值清明節呀!!!!!個阿姐聽到佢話送比人，一定以為佢傻o架~~

不過同呢個傻佬一齊真係好開心o架，因為佢時不時會比我一啲"估你唔到喎"o既驚喜同快樂，就咁我哋就步向第3年喇~~