變種計劃

隨住十一月o既週年紀念同埋生日興奮過後，民女又敗家精上身，開始構思金絲盛宴(無咁民女版)~~

睇住把倒數間尺每日都提住我又少一日，o個種緊張不安焦慮煩躁發惡夢一一湧現(okok，我估到實有jm叫我食靜心o架喇，但呢種嘢幫唔到我o架，除非有樣嘢食叫"黃金")

開頭雄心壯志要做的DIY項目，因為錢錢錢錢同時間有限，大半都胎死腹中(我個腹死咁多嘢唔怪得無腰啦)

其實未開始倒數一年，我已經成日發夢見到自己大日子呢樣唔齊又o個樣漏咗，尋晩仲奇怪......居然發夢同查理斯鬧交!!! (鬧交分手夢平均一個月都發一次，所以唔駛大驚小怪)

我居然係為咗"忟泥"而同查理斯鬧交呀!!!!

撞鬼我應該係忟泥忟到short咗，我見到自己要鋪樓梯o個啲紙皮石呀，今次係要忟英泥呀，最慘係我無工具搞o個啲泥，要用自己隻手指呀，發夢都feel到啲泥漿住隻手指同埋好鬼凍囉......唉，我卒之明白點解有人瞓瞓o下會死咗喇，應該係佢太投入個夢喇......

亦都因為已經唔夠一年(曾經以為呢日來到時會好開心好自豪咁同人講：我仲有唔夠一年就結喇~~)，好多嘢無得再Hea再話睇定啲先啦再諗o下啦，好多項目要切實執行同埋解決喇~~亦都親身體驗咗好多突如其來的因素打亂了計劃，咁都唔緊要，因為錢可以解決絕大部份的問題，但而家個問題係：我哋好窮呀!!!!!

第一個變種計劃：出門問題。

原先諗好咗o係新屋出門，行過去男家斟茶，因為真係過條馬路就係喇，但而家有變數，男家要改為新屋，咁即係我要另覓出門地點，我娘家係新界北喎，叫啲姊妹要幾點入o黎化粧set頭呀?!!!!

咁即係要搵酒店啦.....

完全明白點解啲人玩玩o下大富翁唔玩要出酒店大亨，因為開酒店先可以發達o架!!!!

新屋附近又要步程可以到達的酒店只有三間

1. 港島海逸君綽酒店 ─ 行政套房($3.5-4k)

2. 城市花園酒店 ─ 城市套房($2.5-3.5K)

3. 香港麗東酒店 (2.5K-3K)

論名氣，大家當然係會話君綽好啦，但君綽約幾個月前發生過床蛩咬人事件，我好驚大日子一路R身R勢一路斟茶喎........

我最想o既當然係Book半島出嫁啦~~但係要7k-8k呀!!!!! 太貴了~~

好衰唔衰，睇o下半島網頁又比我發現咗呢個最新優惠：

高級套房只係$5880 o乍!!!!!雖然我哋book咗佢擺酒都無呢個優惠價呀!!!!!!

如果出年都仲有呢個優惠就好喇~~

而家約咗星期六去睇君綽的套房，睇完再同大家分享吖~~