我是不加思索

寫於2010-10-25

天時(下個月係我們的8週年紀念) +  地利(敗家地點適中) +  人和(查理斯去咗咖喱國公幹)

= 我又敗家去~~ (okok，我知自己成日唔慳家，但睇埋落去先啦~~)

尋日下午我去咗半島.....中心，為週年慶典做好準備~~(梗係唔係又係半島啦，o係半島擺酒唔等於半島贊助我一切啊~~)

事原星期五晚約咗好友食飯又未齊人，我去咗手創拾派睇嘢，見到有幅馬賽克砌成的獅子畫好得意，於是就打算砌啲嘢作為禮物喇~~

揀呀揀，都係諗住hea砌啲「I Love U」(仲要諗咗用U代替You慳番啲磚仔)，突然好友抽出一份$35的馬賽克長畫架套裝，真係好抵呀!!!! (心諗買咗唔砌咪屈查理斯砌囉~~)

但係番到屋企又開始頭痕喇，究竟從何入手呢？

對住o個pack顏色唔多靚o既DIY套裝，真係唔多想郁手，上網搵o下有無啲咩素材可以加落去 / 教人整o既web先，搵搵o下見到呢度：

Art square：http://www.artsquare-workshop.com/

佢話有啲一日課程，同埋講到係馬賽克的專門店咁，於是星期六長週放咗工先番上水，然後就出咗去尖沙咀呢間舖度睇o下喇~~

o個度真係有好多馬賽克磚啊~~

我一早就諗好咗要整字(因為我唔會識得砌圖案啊~~除非長方形、正方形都算係.....)，字句係：

To Have & To Hold (靈感來自好耐之前睇到o既weddind dish)

因為要砌咁多隻字，所以塊底版都要有番咁上下大，我揀咗一塊大約係A4打橫的2/3咁大o既平平無奇木板，點知老闆娘話要按size收費o架，佢話佢哋有條公式計算要收幾多錢喎 (我心諗：應該係你有條公式睇o下我呢條水魚會比幾多錢....)

計完後，佢話要$430，包晒所有材，咁.....唉.....鬼叫自已完全唔識咩，咁以禮物o黎講都算平啦，好啦.....點知佢話未計塊板錢喎，又要$38.....佢仲提我一句：如果你自己有板可以自己帶都得 (不過後來我搵過10蚊店又搵唔到....平時好多o架，啲嘢真係你搵佢就無.....)

約咗星期日一點開工~~

一點準時到達，看到很多的馬賽克真的不知從何入手......

過程真係唔講喇，自己睇

1.先用膠水貼好啲磚

2.忟泥

總之由1點砌到6點，個導師見到我幅傑作的評語係：

「ar......你好有耐性呀!!!!....... 坐咁多個鐘都得!!!!! 好少人好似你咁一次過做完o架~~」 (大佬呀，如果你呢個唔係一日速成班，我做咩要o黎呢度呀？)

佢係完全無讚過我幅畫o架.......點解？

 

如果你哋都好有興趣去幫襯呢間嘢，

我會同你講：慳番把啦

不如我教你好過喇

話說我一路砌o個個肥老闆娘就話：

其實呢就唔係好似你咁亂砌o既，係有方法同竅門o架，不過你呢啲學一日o既，我都無謂教你咁多嘢啦.....

(真係想講，你出少句聲睇落去會靚好多囉~~)

 

人哋啲字已經選了用淺色啊，底色一早想好了要用黑色閃閃的大粒磚，佢一聽到，面色變咗少少，然後話：

「你又話比人結婚用o既？黑色唔好呀~~」 (其實用o個個係我啊...我都唔介意.....)

我再選了一隻銀色閃粉的，佢又話：

「銀色呢啲咁閃，好俗囉.....呢啲係霎眼嬌，唔襟睇o架!!!」 (我真係想講，我都唔襟激o架~~)

然後我再選了其他材料佢都ban !  ban !! ban !!!

圓水晶石──咁咪填唔到啲空隙位囉(我而家又唔係用啲磚起屋,做咩要填滿啲空隙呀)

彩色細磚──呢啲要加錢o架喎(我個朵叫金絲雀呀，比條毛你都夠找數啦)

大粒閃石──都話咗閃石係好俗咯 (咁俗你又入貨?!!!!)

講到尾你都係覺得我咁樣用你啲磚你會蝕大本!!!!

 

最後，我接納咗佢的建議，用枱面人哋整第二啲作品時"鏗"爛咗o個啲碎磚......

佢仲猛揀啲淺色比我，結果一砌完，我覺得......

自己的畫作由鮮明簡易風轉了走柔和抽象風啊......

怎麼我自己都不易看出那些字母呢？

叫本身已是半盲的查理斯如何看出來啊？

不過，我不灰心，

搞不好有日有富翁發雞盲欣賞起我的大作來，

我就名留青史揚威萬世，

到時我的這幅作品就名為──

「金絲雀8週年不加思索之傑作」